نوراz
عدد المساهمات : 62
تاريخ التسجيل : 22/10/2010
الموقع : ........................
 | | موضوع: حوار الأصدقاء الجمعة نوفمبر 12, 2010 11:54 am | |
|
هى : ما تيجى نخرج نتمشى فى الجنينة .. أنا زهقت من قعدة البيت ؟؟
هو :لأ .. أنا لسه جاى من بره .. وتعبان وعايز أنام
هى : ياباى عليك .. مفيش حاجة أطلبها منك وتنفذها لى أبداً ؟؟
هو : لأ أبداً .. بس حقيقى تعبان .. أصلى جريت كتير النهار ده فى النادى
هى : آه .. قول كده .. طول النهار بتجرى فى النادى وراها !!
هو : ورا مين بس ؟؟ أنا كنت مع أصحابى
هى : أصحابك .. عليه أنا الكلام ده .. ده إنت تلاقيك غرقان لودانك .. وأتاريك كل يوم تيجى مش قادر تمشى .. ومتعفر
هو : ياشيخة .. ماتظلمنيش ..ده تراب من الملعب .. تصدقى النهار ده سبقت كل أصحابى .. وكنت بأتمنى تكونى موجودة .. وتتفرجى عليه
هى :يابختك .. كل يوم بتخرج .. تركب العربية .. وتتفسح وتروح النادى .. عينى عليا أنا ..محبوسة على طول .. بالذمة ده عدل ؟؟ أنا حفرقع من جنابى
هو : إيه بس مالك ؟؟ ما إنت قاعده بتاكلى وتشربى ومستريحه .. إنت ناقصك حاجة ؟؟
هى :أيوه ناقصنى .. إشمعنى يعنى إنت تخرج وتتفسح وأنا لأ .. وللا إنت على راسك ريشه ؟؟
هو : شوفى بقى .. طولة لسان لأ .. وبعدين أنا صاحبى بيتباهى وأنا ماشى معاه .. لإنى بحميه .. لكن إنت صاحبتك حتخرجك ليه ؟؟ .. معقول تاخدك معاها وهى عند الكوافير .. وللا فى حفلة أو سهرة ؟؟
هى : ماتخدنيش ليه ؟؟ ما دامت بتحبنى .. زى ما بتقوللى طول النهار .. وتقعد تحسس على شعرى .. وعلى ديلى .. وتحطلى فيونكات ملونة فى رقبتى
هو : إنت أصلك قطة .. متنفعيش تدخلى فى المجتمعات الراقية والسهرات
هى : وإنت .. ما إنت كلب .. ليه بتخش فى المجتمعات الراقية والنوادى ؟؟
هو : الحيوانات مقامات
هى : ده فى البلد المتخلفة دى بس .. ده أنا سمعت إن فى بلاد الخواجات .. القطط الحلوة اللى زى .. بتبقى مع صاحبتها فى كل حتة .. وحتى لو ماتت القطة يعملولها مقبرة حلوة بالرخام .. وتيجى صاحبتها كل يوم تزورها وتحط لها ورد
هو : دى عالم فاضية .. ما تفوقى بقى .. انت بتحلمى ..إنت حقك تحمدى ربنا على النعمة اللى إنت فيها .. مش أحسن ما كان زمانك مرمية فى الشوارع وبتدورى على الأكل من صفايح الزبالة ؟؟ صحيح اللى إختشوا ماتوا
هى : جاك موتة أما تاخدك .. ده إنت اللى تاكل من صفايح الزبالة لإنك كلب جربان .. أنا عارفه صاحبك مستحملك إزاى .. أما أنا .. فأنا قطة جميلة .. سكرة
هو : حوش .. حوش .. العسل الى بيخر منك .. أنتى ما بتشوفيش نفسك فى المراية ياعفشة !!
هى :أنا عفشة ياأذعر ياجربان .. يأبو نص ديل
ويتم التراشق بالألفاظ .. والنونوة .. والهوهوة ..والهجوم والصراع الأزلى .. ولم يتم فض الإشتباك بين الأصدقاء .. حتى كتابة هذه السطور ]  | |
|
